Руіны і адноўленая веліч. У Залессі адкрылася выстава «Скрозь прызму руінаў» літоўскага мастака Раманаса Барысаваса
06.02.2019
Навiны рэгiёна
У Залессі одкрылася выстава «Скрозь прызму руінаў» літоўскага мастака Раманаса Барысаваса, якога часта называюць літоўскім Напалеонам Ордай. Выстава – сумесны праект музея-сядзібы імя Агінскага і Генеральнага Консульства Літоўскай Рэспублікі ў Гродне, рэалізаваны па ініцыятыве Мікалая Логвіна, ганаровага консула Рэспублікі Беларусь у Клайпедзе. Да кожнай з работ Раманас Барысавас піша тэксты з тлумачэннямі, каб гледачы маглі гэтак жа зразумець і акунуцца ў прыгажосць таго ці іншага будынка. І вось ужо на нас глядзяць не проста руіны, а стомлены жыццём замак. Ці старэнькая царква, якая нядаўна зусім склікала пераліўным звонам вернікаў…
Варта зазначыць, што ёсць і іншага кшталту работы – выявы адноўленых палацаў. Ці тыя, што нагадваюць, з якіх руін яны паўсталі. Так сталася з Крэўскім замкам. Цяпер ідзе яго паступовая рэстаўрацыя, а з карціны ён глядзіць на нас яшчэ такім, якім быў некалькі гадоў таму. Гальшанскі замак таксама мае ўжо не сённяшні выгляд. Побач в літоўскай спадчынай – беларускія жамчужыны: Лідскі, Мірскі замкі, палац у Косаве, маёнтак графаў Тышкевічаў у Валожыне, музей-сядзіба ў Залессі… І гэта невыпадкова. Як кажа сам мастак, вялікая частка гісторыі нашых дзяржаў – агульная.