– Наша аб’яднанне налічвае 185 чалавек, і ў выставе ўдзел бяруць больш як сто аўтараў. Калі казаць пра работы, іх больш як дзве сотні, – распавяла Алена Маліноўская, кіраўнік народнага аб’яднання майстроў народнай творчасці і мастакоў “Гарадзенскі каларыт”. – Прыемна, што прадстаўлены як старадаўнія, так і сучасныя віды творчасці. Таму побач з вядомымі ў горадзе майстрамі ўдзел бяруць пачаткоўцы. Да таго ж многія аўтары прадставілі новыя менавіта для іх кірункі дзейнасці.
Саломапляценне, кераміка, кавальства, бондарства, вышыўка, вырабы са скуры, тэкстыльныя лялькі суседнічаюць з вырабленымі з паяльнай лампы качкамі, дзіўнымі дошкамі-пано, што спалучаюць дрэва і глазур. А калі толькі ўваходзіш у залу, позірк адразу спыняецца на калекцыі жаночых сукенак “Раскоша” ад Наталлі Маёравай. Іх адметнасць - інкрустацыя саломкай. Яшчэ адну калекцыю сукенак прадставіла Эла Едэшка. З жаночых упрыгожванняў уражваюць асабліва ажурныя карункі. Яны звязаны Ірынай Салей.
Багата ў экспазіцыі карцін. Яны намаляваны фарбамі ў розных стылях, вышыты, выраблены з воўны ў тэхніцы валяння, зроблены са старых дошак, скуры. Ёсць нават пано ў тэхніцы “скульптурны жывапіс”, пялёсткі кветак на іх – са штукатуркі.
Прынамсі, кожны экспанат на гэтай выставе не падобны на іншыя. Нездарма госці адзначылі, што гэту экспазіцыю можна разглядаць асабліва доўга. І нават прыйсці на выставу не адзін раз. Пабачыць працы гродзенскіх майстроў можна ў галерэі на вуліцы Ажэшкі.
#ремесло #выставка #новости гродно