Адзіны інфармацыйна-адукацыйны рэсурс для школ запусцяць у тэставым рэжыме з 1 студзеня 2021 года
"Настаўнікі актыўна выкарыстоўваюць інфармацыйна-камунікацыйныя тэхналогіі на працягу шэрага гадоў як пры правядзенні ўрокаў, так і для арганізацыі самастойнай работы вучняў. На нацыянальным адукацыйным партале размешчана інфармацыя аб інтэрнэт-сэрвісах, якія можна выкарыстоўваць пры арганізацыі адукацыйнага працэсу. Выкарыстанне ІКТ ва ўстановах агульнай сярэдняй адукацыі дало магчымасць ва ўмовах няпростай эпідэміялагічнай сітуацыі забяспечыць навучанне ўсіх вучняў у IV чвэрці з наступнай іх атэстацыяй па выніках 2019/2020 навучальнага года", - расказала Ірына Каржова.
Разам з тым педагагічная грамадскасць разумее, што ва ўмовах актыўнай лічбавізацыі ўсіх працэсаў сістэма адукацыі не можа стаяць на месцы і задавольвацца існуючымі напрацоўкамі. "Рэаліі часу прымусілі нас паскорыцца, і яшчэ вясной было прынята рашэнне аб стварэнні адзінага інфармацыйна-адукацыйнага рэсурсу для ўстаноў агульнай сярэдняй адукацыі. Плануецца, што платформа пачне працаваць у тэставым рэжыме з 1 студзеня 2021 года, - адзначыла намеснік начальніка галоўнага ўпраўлення. - Але пры гэтым размова не ідзе аб тым, што інфармацыйна-адукацыйны рэсурс заменіць рэальны вучэбны працэс у школе".
Паводле слоў Ірыны Каржовай, адукацыйны рэсурс дапоўніць працэс вывучэння вучэбных прадметаў, стане метадычнай падтрымкай для навучання тых вучняў, якія па якіх-небудзь прычынах часова не могуць наведваць установу адукацыі або маюць патрэбу ў дадатковым растлумачэнні вучэбнага матэрыялу пры выкананні дамашніх заданняў. Ён уключае пералік вучэбных матэрыялаў, а таксама розныя сэрвісы для арганізацыі і кіравання адукацыйным працэсам (электронны дзённік, журнал, камунікацыя ўдзельнікаў адукацыйнага працэсу і інш.). Бібліятэка вучэбных матэрыялаў структуравана па вучэбных прадметах, класах, тэмах вучэбнай праграмы па прадмеце і будзе паступова папаўняцца новымі матэрыяламі.
"Стварэнню платформы папярэднічала вывучэнне айчыннага вопыту і вопыту іншых краін у распрацоўцы такіх рэсурсаў. Да распрацоўкі адукацыйнага кантэнту запрошаны лепшыя настаўнікі з усіх рэгіёнаў рэспублікі. У абласцях створаны творчыя групы, у склад якіх увайшлі ў першую чаргу настаўнікі-метадысты, настаўнікі вышэйшай кваліфікацыйнай катэгорыі, педагогі - аўтары вучэбных дапаможнікаў, якія маюць вопыт стварэння электронных адукацыйных рэсурсаў. У работу ўключыліся ўдзельнікі рэспубліканскага клуба "Хрустальны журавель". Работу педагогаў па распрацоўцы адукацыйнага кантэнту каардынуюць рэгіянальныя інстытуты развіцця адукацыі. Распрацаваныя вучэбныя матэрыялы прайшлі метадычную экспертызу ў Нацыянальным інстытуце адукацыі, Акадэміі паслядыпломнай адукацыі, Мінскім дзяржаўным лінгвістычным універсітэце", - дадала Ірына Каржова.